الدعم العربي

شــهــــرزاد
من صغر سني يا شهرزاد
مع إني مقصوص الجناح
لكني بحلم ..
إني أصبح سندباد
وأعمل ضلوعي مركبه
وقلبي شراع
و ايديا في النيل مجدافين
و أخدك ف حضني
و ألففك كل البلاد
وإن جعتي ..
حبي راح يكون لك
أحلي زاد !
ولو عطشتي ف سكتك
قلبي عشانك سلسبيل !
وعشان أليق بيكى بصحيح
بحلم أكون فلاح فصيح
راضع حروف الحكمة
من قلب الكتاب
علامة في القرآن
وإنجيل المسيح
أصرخ ف وش الليل ..
يشيب
وأعمل نجوم الليل سلالم
للقمر نوصل إليه
وأبنى في حضنه
قصر عالي تسكنيه
وأعمل شبابيكه
بناني للحمام
يام الضفاير نخلتين
والخدود تفاح
و طايب ع الجبين
والكحل ف عيونك
دوا للعاشقين
حبيبتي .. يا ست الصبايا
أقول كمان ..
عيونها بتضلل ..
علي كل الأنام
ورموشها ممكن تحتهم
أفرش وأنام
بسمتها نور
ممكن تخضر أرض بور
و الصحرا تتحول قصور
يا م العيون ..
بحرين وفا .. بحرين دفا
موجهم سحابة حب
في ليل الصفا
عاشق أنا وعشان بحبك
لو ح عيش مليون سنه
عنك بعيد
بكره تشوفي محبتي
في كل بسمه تفوت عليكى
منوره
وف كل نسمه تبوس عنيكى
معطره
يا شهرزاد !
عادل الحلبي